કિર્ગિસ્તાનમાં યોજાઈ એશિયન રેસલિંગ ચેમ્પિયનશિપ અંજૂ - હર્ષિતાને કુસ્તીમાં મળ્યો સિલ્વર મેડલ
- 15 Apr, 2024
ભારતની મહિલા રેસલર અંજૂ અને હર્ષિતાએ એશિયન કુસ્તી ચેમ્પિયનશિપમાં પોત પોતાના વજનવર્ગમાં શાનદાર દેખાવ કરીને ફાઈનલમાં બીજો ક્રમ મેળવીને સિલ્વર મેડલ જીત્યો હતો. પરંતુ અનુભવી સરિતા મોરનો પ્રથમ રાઉન્ડમાં જ પરાજય થતા તે બહાર થઈ ગઈ હતી. નેશનલ ટ્રાયલ્સમાં 53 કિ.ગ્રા. વર્ગમાં વિનેશ ફોગાટને હરાવીને ચર્ચામાં આવેલી રેલવેની રેસલર અંજૂએ ફિલિપાઈન્સની આલિયા રોઝ ગાવલેઝ અને શ્રીલંકાની નેથમી અહિંસા ફર્નાન્ડો સામે તકનિકી શ્રેષ્ઠ દેખાવના આધારે જીત મેળવી હતી.
સેમિફાઈનલમાં અંજૂએ ચીનની ચેન લેઈ સામે પડકાર મળ્યો હતો પરંતુ તે 9-6થી મુકાબલો જીતવામાં સફળ રહી હતી.ગોલ્ડ મેડલ માટે ફાઈનલમાં અંજૂનો સામનો કોરિયાની જિ હયાંગ કિમ સામે થયો હતો જેમાં તે આશ્ચર્યજનક રીતે એકપણ પોઈન્ટ હાંસલ કરી શકી નહતી અને સિલ્વરથી સંતોષ માનવો પડ્યો હતો. દરમિયાન ભારતની અન્ય રેસલર હર્ષિતાએ ફાઈનલ સુધીની સફરમાં ફક્ત ત્રણ અંક ગુમાવ્યા હતા.
તેણે ઉઝબેકિસ્તાનની ઓઝોદા ઝરીપબોએવાને તકનિકી શ્રેષ્ઠતાના આધારે (13-3) માત આપી હતી. કઝાકિસ્તાનની અનાસ્તાસિયા પાનાસોવિચને 5-0થી હરાવવામાં સફળ રહી હતી. ફાઈનલમાં ચીનની કિયાન જિયાંગ સામે 2-5થી હારતા ગોલ્ડ ગુમાવ્યો હતો. સરિતાનો પ્રથમ બાઉટમાં મોંગોલિયાની ગંટુયા એનખબાત સામે 4-8થી પરાજય થયો હતો. ત્યારબાદ એનખબાત પણ સેમિફાઈનલમાં હારતા ભારતીય રેસલર માટે રેપચેઝનો વિકલ્પ બંધ થઈ ગયો હતો.
ગુજરાત વંદનના whatsapp ચેનલમાં જોડાવા આ લિંક પર ક્લિક કરોઃ
https://shorturl.at/hjzN0